ABSTRACT
Kei tēnā iwi kei tēnā iwi āna ake kōrero me ōna ake whakaaro. Ko te mātau ranga tēnei. He kōrero kua tukuna mai i tētahi reanga ki tētahi reanga, he whakaaro kua wānangahia e tētahi iwi, he mātauranga kua whangaihia ki te marea hei kai mā te hinengaro hei oranga mō te tini ngerongero. E kore e taea te whakawehe i te mātauranga me tōna whenua me tōna iwi. Kei ngā maunga whakahī, kei ngā wai whakaika, kei ngā whenua huakura te mātauranga e takoto ana, ā kei runga ake nei te iwi e noho ana. Kei roto i te mātauranga ko te māramatanga e takoto ana. Inā whai koe i te mātauranga ko te māramatanga tōna otinga. Ko tēnei māramatanga he tūhonohonotanga a te tangata ki te whenua, ki tōna iwi, ki tōna ao. Engari i tēnei ao hurihuri me tēnei ao rangitāmiro, kua ōrite te āhua o ngā iwi katoa. Kua mimiti te puna o te mātauranga o ngā iwi taketake o te ao, kua whānui ake te moana o te mātauranga o te iwi kotahi.
