ABSTRACT
Crystyn men and woymen, such day 3e schul haue Saynt Ionys 16 day þe Baptist, þat ys callyd so, for he folowet oure Lord Ihesu Crist yn þe watyr of Iordan. Wherfor 3e schul þat day com to chyrch yn worschyp of God and Saynt Ion, and also 3e schul fast þe euyn. Þen 3e schul know how such euons werne furst fownde 20 yn olde tyme. At þe begynnyng of holy chyrch men and woymen comen ouer nyght to þe c[h]yrch wyth candels and oþer lyght, and wakyd in þe chyrch al þe nyht yn hor deuocions; but aftyr by proces of tyme men laftyn such deuocyon, and vsut songys and 24 daunsys, and soo fellyn ynto lechery and gloteny, and þus turnyd þe good holy deuocion ynto syn. Wherfor holy fadyrs ordeynut þe pepull forto leue þat wakyng, and fast þe euyn; and soo turnet þe wakyng ynto fastyng. But 3et hit haldyth þe name, and ys callyd 28 yn Lateyne vigilia, þat ys wakyng yn Englysch; and yn Englysch ys callyd þe euyn, for at evyn þay werne wont forto come to the chyrch as I haue told you. But 3et, yn þe worschip of Saynt Ion, men waken at evyn, and maken þre maner of fyrys: on ys clen 32 bonys and no wod, and ys callyd a bonnefyre; anoþer ys of clene wod and no bonys, and ys callyd a wakefyre, for men syttyth and wakyth by hyt; the thryd ys made of bonys and of wode, and ys callyd Saynt Ionys fyre.
